నిత్యం ఆరోగ్యంగా మెలగాలంటే.. రోజు జాగింగ్ చేస్తే ఎంతో శ్రేయస్కరమని ఆరోగ్య నిపుణులు చెబుతున్నారు. జాగింగ్ చేయడం వల్ల శరీరంలో పేరుకుపోయిన అనవసరమైన కొలెస్టిరాల్.. చెమల రూపంలో బయటకు విసర్జన చేయబడుతుందని.. తద్వారా గుండె ఆరోగ్యంగా వుంటుందని అంటున్నారు.జాగింగ్ చేయడం వల్ల గుండెపై భారం పడుతుంది. దీనివల్ల గుండె మరింత ఆరోగ్యవంతంగా ఎక్కువకాలం పనిచేయడానికి అవకాశం ఉంటుంది. అలాగే.. జాగింగ్ చేసే సమయంలో గాలిని ఎక్కువగా పీల్చుకుంటాము. అలా గాలిని లోనికి ఎక్కువగా పీల్చుకోవడం వల్ల శరీరంలోని శక్తి వినయోగమవడమే కాదు.. అంతకుమించిన శక్తి ఉద్భవిస్తుంది.
నిజానికి జాగింగ్ చేసే అలవాటు లేనివారు పరుగెత్తాల్సి వచ్చినప్పుడు విపరీతమైన ఆయాసం వస్తుంది. అప్పుడు దాహం ఎక్కువగా వేయడంతోపాటు కళ్ళు తిరిగినట్లు అనిపిస్తుంది. అలాంటి సమయంలో కాస్త రెస్ట్ తీసుకుని, తిరిగి మళ్ళీ జాగింగ్ చేయాలని నిపుణులు చెబుతున్నారు. అలా క్రమం తప్పకుండా జాగింగ్ చేయడం వల్ల శరీరాన్ని ఆరోగ్యంగా ఉంచుకోవడమేకాదు.. పరుగెత్తినప్పుడు ఆయాసం రావడం వంటివి తగ్గుముఖం పడుతాయని వారు సూచిస్తున్నారు. జాగింగ్ అనేది శరీరాన్ని అలసట లేదా ఒత్తిడి తట్టుకుని నిలిచేలా చేయగలిగే ప్రక్రియగా చెబుతారు. జాగింగ్‌ను ఆరుబయట ప్రదేశాల్లో చేయడం వల్ల మనలోని మానసిక అలజడి తగ్గి, ప్రశాంతతను కలిగిస్తుంది. శరీరం కొత్త ఉత్సాహాన్ని పుంజుకుంటుంది. అందుకే.. రోజూ ఉదయాన్నే జాగింగ్ చేస్తే ఎంతో మంచిదని నిపుణులు చెబుతున్నారు.
జాగింగ్ చేయడానికి ప్రత్యేకమైన వస్తువులు, సౌకర్యాలు కూడా అవసరం లేదు. బాగా సౌకర్యవంతంగా ఉండే బూట్లను వేసుకుంటే చాలు. కాబట్టి మంచి షూ తీసుకుని, వాతావరణానికి అనుగుణంగా చెమటను పీల్చుకునేలా ఉండే బట్టలను వేసుకుని చక్కగా జాగింగ్ ప్రారంభించండి. మీ గుండెను పదిలం చేసుకోండని ఆరోగ్య నిపుణులు అంటున్నారు.